Гробаправод: як праходзяць пахаванні акупантаў

Галоўная дзяржаўная тайна Расійскай Федэрацыі – колькасць трупаў рускіх салдат на палях і ў лясах Украіны, а таксама на вуліцах украінскіх гарадоў і вёсак. Дакладны лік забітых «вызваліцеляў» засакрэчаны і старанна хаваецца.

Яшчэ 4 сакавіка Украінская жалезная дарога накіравала 20 вагонаў-рэфрыжэратараў на станцыі Фастаў, Адэса-Застава, Падольск, Мерэфа і Запарожжа. Вагоны прастаялі на станцыях трое сутак, але целы расійскіх салдат так і не пачалі грузіць праз нежаданне расіян забіраць загінуўшых.

Афіцыйныя дадзеныя ўкраінскага боку аб стратах расійскіх салдат кажуць пра 11 тысяч забітых салдат і афіцэраў Узброеных сіл РФ, Расгвардыі і іншых падраздзяленняў. У самой Расіі гэтую інфармацыю абвяргаюць і імкнуцца блакаваць любыя інфармацыйныя рэсурсы, якія публікуюць фота і відэа са стратамі расійскіх войскаў.

Больш складана ідуць справы з блакаваннем інфармацыі аб параненых, колькасць якіх перавышае колькасць загінулых. Украінскія лекары на акупаваных тэрыторыях, убачыўшы «рускі свет» на ўласныя вочы, не спяшаюцца аказваць медыцынскую дапамогу ворагу. Смяротнасць сярод параненых высокая – нават сярод тых, каго ўдалося эвакуяваць у Расійскую Федэрацыю і Рэспубліку Беларусь. Менавіта інфармацыю пра памерлых у шпіталях схаваць цяжэй за ўсё.

Пакуль Крэмль імкнецца не дапусціць пахавання, трымаючы трупы сваіх салдат максімальна доўга ў моргах. Аднак нават у такіх умовах па ўсёй Расіі праходзяць пахаванні грузаў 200.

5 сакавіка кіраўнік Тувы распавёў, што на тэрыторыі Украіны загінулі двое байцоў рэспубліканскага ўпраўлення Расгвардыі, а менавіта прапаршчыкі паліцыі Ахмет Бурушпел-ааловіч Маады і Садунам Сяргеевіч Шалык. Сёмага сакавіка было заяўлена пра новыя трупы: салдаты Адыгжы Хулер-ааловіч Куулар і Павел Васільевіч Князеў.

Так, кіраўнік Дагестана Сяргей Мелікаў пацвердзіў гібель афіцэра з Дагестана Нурмагамеда Гаджымагамедава. Кіраўнік Калмыкіі Бату Хасікаў прызнаў гібель ва Украіне ўраджэнца рэспублікі сяржанта-кантрактніка Канстанціна Манджыева. Паводле слоў Хасікава, Манджыеў таксама загінуў “падчас спецаперацыі па абароне Данбаса”. Пазней стала вядома пра яшчэ два пакеты з целамі, якія едуць у Дагестан – гэта два ўраджэнцы вёскі Хучні Табасаранскага раёна Дагестана і адзін жыхар Карабудахкенцкага раёна. Пра іх гібель паведамілі на афіцыйных старонках мясцовыя адміністрацыі.

Прэзідэнт Татарстана Рустам Мініханаў выказаў спачуванні ў сувязі з гібеллю салдата з Ніжнякамска Ільнура Сібгатуліна.

Кіраўнік Мардовіі Арцём Здуноў абвясціў, што падчас ваенных дзеянняў ва Украіне загінуў ураджэнец эрзянскай вёскі Чукалы Віктар Ісайкін.

Губернатар Астраханскай вобласці Ігар Бабушкін таксама расказаў пра гібель ваеннаслужачага з Краснаярскага раёна Армана Нарынбаева, казаха па нацыянальнасці.

Былі паведамленні пра забітых і з іншых рэгіёнаў Расіі, сярод якіх Кіраўская, Самарская, Пензенская і Ульянаўская вобласці.

У Кіраўскай вобласці пахавалі 24-гадовага кантрактніка Івана Карасцялёва.

У Буратыю вяртаецца старэйшы лейтэнант Ілля Сямёнаў, які ваяваў у Чачні, Паўднёвай Асеціі і Сірыі. Ён вяртаецца ў пакеце.