Башкартастан: малюнак плана пабудовы новай дзяржавы

БашНацПаліт апублікаваў бачанне будучага ладу Башкартастана, прапанаванае маладым башкірам. Арганізацыя просіць строга не меркаваць, а даць свае рэкамендацыі і парады па паляпшэнні праграмы.

Сёння апазіцыя толькі і робіць, што крытыкуе ўладу. Вядома, я не кажу, што гэтая праца не патрэбная, усе злачынствы дзейнай улады павінны быць расследаваныя, а вінаватыя пакараныя. Але мала хто кажа пра альтэрнатыўную пабудову дзяржавы, пра тое, якой багатай і паспяховай можа быць Башкартастан і ўсе яе жыхары. Людзі не вераць, што наша рэспубліка можа быць самадастатковай і развітай, я ж хачу прапанаваць план пабудовы на руінах дыктатуры новага парадку.

Суверэнітэт

Найважнейшае пытанне – гэта статус рэспублікі. Я з’яўляюся прыхільнікам пабудовы незалежнага Башкартастана, са сваёй эканомікай і міжнароднай палітыкай. Я не бачу ніводнага шанцу на вяртанне суверэнітэту ўзору 90-х гадоў, бо мы бачым, да чаго прыводзіць узмацненне вертыкалі ўлады – гэта проста запусціць новае заганнае кола: так, першы час у нас будзе новы ліберальны кіраўнік, мы будзем развівацца і будаваць дэмакратыю, а потым раптам здарыцца новы 98-ы ці пандэмія, а можа, тэхнагенная катастрофа ці любы іншы крызіс, які распаліць рэваншысцкія настроі рускага імперыялізму, да ўлады прыйдзе новы «моцны лідар», які ва ўмовах вольных СМІ будзе жорстка казаць аб гэтым дэмакратычным лідары, выйграе выбары на кантрасце і паступова ўсталюе новы аўтарытарны рэжым, а потым карупцыя, цэнзура, вайна, разруха – і новы ліберальна-дэмакратычны прэзідэнт? Мы не жадаем наступаць на адны і тыя ж граблі і спадзявацца, што ў гэты раз усё будзе па-іншаму.

Вядома, у Маскве будуць слёзна абяцаць, што на гэты раз мы створым працуючыя дэмакратычныя інстытуты, якія створаць баланс судовай, заканадаўчай і выканаўчай улады, але хопіць, мы не верым гэтаму. Башкартастан тры разы падпісваў дамову з маскоўскімі ўладамі: пры Іване Грозным, пры Леніне і пры Ельцыне – і ніколі Масква не стрымлівала свайго слова. Гістарычна можна заключыць, што Расея не можа стварыць нармальную дзяржаву, праз свой памер яна заўсёды спараджае рэпрэсіі, войны і няшчаснае насельніцтва. Пакуль будзе захоўвацца ўлада аднаго горада над вялізнымі багатымі тэрыторыямі, імперыялізм не памрэ, ён будзе зноў і зноў ствараць новых дыктатараў.

Таму мы патрабуем незалежнасці і захавання права нацыі на самавызначэнне. Чаму па логіцы Расеі Крым мае права на самавызначэнне, а Башкартастан, Татарстан і Чачня не? Да таго ж пасля таго, як Расея страціць анексаваныя тэрыторыі Украіны (Луганская, Данецкая, Херсонская, Запарожская вобласці і Крым), якія па расейскай канстытуцыі знаходзяцца ў складзе федэрацыі, то чаму іншыя тэрыторыі, якія па той жа канстытуцыі знаходзяцца ў складзе РФ, не маюць права пакінуць межы Расеі? Гэта створыць небяспечны прэцэдэнт з рэальнай пагрозай існавання Расеі як адзінай дзяржавы.

Акрамя таго, з эканамічнага пункту гледжання для незалежнага Башкартастана перспектыў у свеце значна больш. Прынамсі не трэба будзе дзесяткі гадоў чакаць, калі здымуць санкцыі, пастаянна насіць свае багацці Маскве, не трэба будзе ўтрымліваць вялізны апарат улады.

Форма праўлення

У самым пачатку трэба дакладна адказаць на пытанне: што такое дзяржава? Калі зусім спрасціць, то гэта орган, які вызначае законы, кіруе грашыма падаткаплацельшчыкаў і рэсурсамі. А задача ў гэтага органа толькі адна – зрабіць жыццё кожнага грамадзяніна сёння лепшым, чым учора. І менавіта гэты прынцып павінен выконвацца ва ўладзе. Я прапаную для працаўнікоў улады ўвесці максімальную столь заробкаў, а менавіта будзе вызначаны мінімальны пражытачны мінімум, абазначым яго літарай P, а заробак чыноўнікаў будзе прыраўнавана k*P. Гэта значыць, што пражытачны мінімум, памножаны на k, дзе k – каэфіцыент, дапусцім, роўны 2, што значыць максімальны заробак чыноўнікаў не можа быць вышэй за два пражытачныя мінімумы, што стымулюе працу чыноўнікаў сапраўды на дабрабыт народа. Павялічыўшы пражытачны мінімум для насельніцтва, яны самі таксама будуць атрымліваць больш.

Башкартастан, безумоўна, павінен быць парламенцкай рэспублікай са сваімі дэмакратычнымі інстытутамі. Але любы рэжым можа скаціцца ў дыктатуру, калі ў парламенце ў адной партыі будзе большасць. Я прапаную стварыць аднамаментна 4 партыі, а менавіта:

· ліберальна–дэмакратычная партыя,

· партыя эколагаў,

· партыя кансерватараў;

· партыя бізнес-прамыслоўцаў.

Я перакананы, што кожны жыхар рэспублікі Башкартастан зможа ідэнтыфікаваць сябе з адной з гэтых партый, а на выбарах у парламент (Курултай) усе партыі ўжо будуць мець па 13% у заканадаўчым органе яшчэ да выбараў, а само галасаванне будзе размяркоўваць астатнія месцы ў парламенце. Таксама ў Курултаі нельга будзе сядзець больш за 2 разы.

Апроч гэтага, кожная партыя вылучае аднаго кандыдата на прэзідэнцкіх выбарах, які прызначаецца толькі 1 раз на 6 гадоў, 2 разы на пасаду балатавацца нельга (хоць запар, хоць не). Па сутнасці гэта чатырохпартыйная сістэма кіравання дзяржавы, дзе кожная партыя прызначае пэўных міністраў унутрыпартыйным галасаваннем. Напрыклад, партыя бізнес-прамыслоўцаў прызначыць міністра гандлю і міністра прамысловасці, і так кожная партыя мае 3/4 сваіх міністраў.

Пераможца прэзідэнцкіх выбараў становіцца прэзідэнтам рэспублікі і займаецца ў большай частцы міжнароднымі справамі дзяржавы, той, хто займае другое месца, аўтаматычна становіцца прэм’ер-міністрам Башкартастана. Той, хто заняў трэцяе месца, становіцца кіраўніком парламента рэспублікі, ну а той, хто заняў чацвёртае месца, становіцца міністрам юстыцыі. Апроч гэтага, павінны быць створаны з нуля такія незалежныя органы ўлады, як пракуратура, суд і нацыянальны банк рэспублікі. Размова пра будучы палітычны лад можна і трэба працягваць, гэта ўсяго толькі накід, ад чаго можна адштурхвацца.

Эканоміка

Башкартастан павінен перазапусціць эканоміку, націснуць кнопку reset з новымі параметрамі запуску. Самае асноўнае – гэта нацыяналізацыя прыродных рэсурсаў, стварэнне новай валюты, увод падаходнай шкалы падаткаабкладання; акрамя гэтага, мы выкупім усе крэдыты ва ўсіх банкаў, у якіх крэдытаваліся жыхары Башкартастана, і патушым іх, гэта вельмі моцна прастымулюе ўнутраную эканоміку, а таксама самае галоўнае – новая праграма падтрымкі малога і сярэдняга прадпрымальніцтва.

Абавязковым я лічу звярнуць увагу на пункт аб стварэнні сваёй нацыянальнай валюты. Башкартастан пасля нацыяналізацыі прыродных рэсурсаў зможа падмацаваць сваю новую валюту золатам, што стабілізуе курс валюты, а рэспубліка атрымае інструмент развіцця, які будзе кіравацца з Уфы.

На першы час трэба будзе ўвесці пошліны на ўсю прадукцыю, вырабленую за межамі Башкартастана, што дазволіць унутраным таварам адчуваць сябе на паліцах магазінаў у значна больш выгадным святле і, такім чынам, прастымулюе вытворчасць і гандаль мясцовых тавараў. Таксама мы дазволім замежным інвестарам і кампаніям на выгадных умовах заходзіць на ўнутраны рынак, што стварае вялікую колькасць новых працоўных месцаў і перазагрузіць эканоміку.

Гэта праграма будзе ўключаць у сябе цэлы шэраг крокаў – пачынаючы ад спрошчанай рэгістрацыі новай справы для ўсіх жыхароў і замежных інвестараў, да льготнага крэдытавання пад 1–2% гадавых з растэрміноўкай плацяжу год. Таксама ў першыя часы новы бізнэс будзе вызвалены ад падатковых выплат – усе гэтыя меры дазволяць у цяплічных умовах вырасціць малы і сярэдні бізнес, які павінен будзе стаць драйверам эканомікі рэспублікі, забяспечыўшы мільёны жыхароў рэспублікі стабільным даходам.

Нам важна, каб новы бізнес выжыў у першы час, адужэў, стаў на ногі і пачаў прыносіць прыбытак. Да гэтай праграмы падтрымкі малога і сярэдняга бізнэсу я буду звяртацца далей неаднаразова.

Харчовая бяспека

Башкартастан валодае вялізнымі сельскагаспадарчымі магчымасцямі і жывёлагадоўчым патэнцыялам. Мы спакойна можам забяспечыць сябе, ды і не толькі сябе ежай у поўным аб’ёме. Для гэтага мы зноў звернемся да вышэйапісанай праграмы падтрымкі малога і сярэдняга бізнэсу. Мы дадзім пачаткоўцу сельскагаспадарчаму прадпрымальніцтву магчымасць апрацоўваць палі, вырошчваць ураджай і займацца жывёлагадоўляй. Дазволім браць выгадныя крэдыты з адтэрміноўкай плацяжу і вылучым землі тым, хто захоча будаваць. Мы павінны спрасціць да мінімуму магчымасць афармлення прадпрымальніцтва з бюракратычнага пункта погляду. Башкартастан зможа поўнасцю пракарміць сябе за свой кошт, а таксама мы будзем рэалізоўваць свае прадукты ў іншыя краіны.

Энергетыка

Башкартастан абавязаны за 10 гадоў стаць тэрыторыяй чыстай энергіі. Таксама мы дамо магчымасць прыватным кампаніям будаваць ветраныя, сонечныя і гідраэлектрастанцыі, мы будзем усяляк падтрымліваць любыя прыватныя ініцыятывы ў пытаннях чыстай энергетыкі, вызваляючы ад выплаты падаткаў на дзесяцігоддзі. Сама дзяржава будзе ствараць новыя гідраэлектрастанцыі – на шчасце, геаграфія нашага рэгіёну дазваляе стварыць вялізную колькасць ГЭС і стаць цалкам энергетычна незалежным.

Я веру, што Башкартастан стане цэнтрам экалагічнай энергіі ў пострасейскай прасторы.

Рэформа адукацыі

Адукацыя ў сучаснай Расеі пакідае жадаць лепшага – гэта савецкая школа ўзору 50–60–ых гадоў, якая эвалюцыянавала і безнадзейна састарэла ў ХХІ стагоддзі. Я прапаную маштабную рэформу адукацыі, якая ўвядзе зусім новыя каштоўнасці і прадметы, новыя крытэрыі паспяховасці, новыя падыходы да адукацыі заснаваныя на псіхалогіі, індывідуалізм і ўзаемадзеянні чалавека і сучасных тэхналогій. Мы падзелім адукацыю на абавязковыя і факультатыўныя напрамкі, і ў залежнасці ад пераваг вучня ён будзе паглыблена вывучаць прадметы на факультатывах, якія будуць наўпрост курыравацца ВНУ. У сваю чаргу ВНУ будуць абапірацца на рынак вакансій, што дасць магчымасць вучню, які атрымаў адукацыю ў рэспубліцы, вельмі хутка адаптавацца і знайсці высокааплатную работу ў самім Башкартастане.

Таксама мова выкладання будзе вар’іравацца ад школы да школы. У Башкартастане будуць працаваць школы на башкірскай, рускай, татарскай, англійскай, украінскай і любой іншай мове, якія захочуць бацькі вучняў.

Дзеці павінны палюбіць вучобу, а не знаходзіцца ў пастаянным стрэсе, а настаўнікі павінны стаць адной з самых прэстыжных і аплатных работ у Башкартастане.

Медыцына

Урачы, разам з настаўнікамі, пажарнымі службамі і паліцыяй, у чацвёртай рэспубліцы стануць адной з самых высокааплатных работ. Мы будзем інвеставаць у сучасную медыцыну і дэлегуем вытворчасць медыцынскага абсталявання і прэпаратаў у рукі прыватнага прадпрымальніцтва па праграме падтрымкі малога і сярэдняга бізнесу.

Я не моцна разбіраюся ў медычнай справе – было б несумленна мне высоўваць нейкія новыя рэвалюцыйны ідэі аб тым, як пабудаваць медыцыну ў рэспубліцы, але дзяржава абавязаная інвеставаць у ўтрыманне і абсталяванне бальніц велізарныя грошы.

Я думаю, што кожная бальніца павінна абзавесціся верталётамі з Кумяртаўскага авіяцыйнага завода, каб на любы зварот у медыцынскую службу нават з самых аддаленых вёсак можна было своечасова аказаць усю неабходную дапамогу.

Армія і паліцыя

Бачачы сённяшнюю злачынную вайну супраць Украіны – маскоўская ўлада, уцягнуўшы туды ўсе рэгіёны, прымусіла нас стаць саўдзельнікамі гэтых злачынстваў, пакаранне за якія Рэспубліка Башкартастан, безумоўна, павінна панесці. Каб такога больш ніколі не паўтарылася, чацвёртая Рэспубліка будзе мець сваё незалежнае кантрактнае войска. Мы будзем рабіць упор на высокатэхналагічнае ўзбраенне і прафесіяналізм, і гэтае войска будзе наўпрост кантралявацца парламентам Рэспублікі Башкартастан, а не каланіяльнай імперыяй з цэнтрам у Маскве. Што тычыцца органаў унутраных спраў, то тут сітуацыя больш складаная: не сакрэт, што сённяшняя паліцыя – адно з самых карумпаваных ведамстваў у Расеі. І тут мы можам звярнуцца да міжнароднага досведу, а менавіта да Грузіі. Мы імгненна звольнім усіх прадстаўнікоў органаў унутраных спраў і сфармуем новую паліцыю, заснаваную на зусім іншых каштоўнасцях. Касцяком яе выступяць сённяшнія партызанскія атрады, якія дзейнічаюць на тэрыторыі Рэспублікі Башкартастан. У нашых сілах стварыць паліцыю, пры выглядзе якой звычайныя грамадзяне не будуць кідацца, а наадварот, будуць пачувацца ў бяспецы. Мы ўвядзем новую рангавую сістэму і будзем працаваць над прыцягненнем да адказнасці тых, хто сёння лаяльна падтрымлівае фашызм у Расеі. Будзь вы прапагандыстам, дробным чыноўнікам, пракурорам ці якой-небудзь службовай асобай – калі вы думаеце, што ў вас ёсць шанец пасля змены рэжыму спакойна жыць і працаваць – вы памыляецеся, мы будзем шчыльна супрацоўнічаць з Украінай, каб знайсці і караць ваенных злачынцаў. Таксама тыя, хто сёння зацята падтрымлівае z–патрыятызм, будуць прыцягнуты да адказнасці за апраўданне і агітацыю пуцінізму.

Вялікая новая будоўля і інфраструктура

Якая колькасць жыхароў Башкартастана вымушана працаваць на будоўлях на поўначы, у Маскве, Піцеры ці ў іншых рэгіёнах? Гэта вялізная колькасць людзей, прафесіяналаў, якія не могуць знайсці дастойную работу ў рэспубліцы, у той час, калі наша інфраструктура, нашы дарогі, будынкі, школы, бальніцы знаходзяцца ў жаласным стане. Мы дазволім стварыць новыя будаўнічыя кампаніі, якія будуць займацца наладжваннем інфраструктуры Башкартастана. Гэта будаўніцтва дарог па новых стандартах, будаўніцтва новых мастоў, жылых раёнаў з развітой інфраструктурай. Кожны, хто сёння змушаны працаваць далёка ад дома, будзе мець годны заробак у сябе дома і рабіць жыццё сваіх сем’яў камфортным. У інфраструктуру Башкартастан вялізныя інвестыцыі, ды і сам будзе актыўна інвеставаць, робячы жыццё людзей камфортным і забяспечваючы работнікаў высокай заработнай платай.

Факультатывы для дарослага насельніцтва

У новай рэспубліцы паўстане вострае пытанне аб тым, што многія людзі страцяцца ў новай рэчаіснасці. І ўрад павінен паклапаціцца аб гэтых людзях – нам будуць патрэбны прафесійныя будаўнічыя кадры, прафесійныя дзіцячыя трэнеры па розных спартыўных напрамках, прафесійныя работнікі рознага роду бізнесу, ды і самі бізнесмены.

Так што мы арганізуем бясплатныя факультатывы па розных напрамках з далейшым працаўладкаваннем і індывідуальным падыходам для жыхароў усіх узростаў.

Пенсіі і пенсіянеры

Пенсіі, безумоўна, лягуць цяжарам на бюджэт Рэспублікі Башкартастан. Але забяспечыць дастойнае жыццё нашага старэйшага пакалення мы павінны. Пенсіі павінны быць на высокім узроўні, які будзе індэксавацца ў залежнасці ад інфляцыі кожны месяц. Таксама для людзей пенсійнага ўзросту неабходна будзе ствараць новыя праграмы падтрымкі ўнутранага турызму – мы прафінансуем турыстычную і медыцынскую галіны за кошт дзяржавы і дадзім людзям старэйшага пакалення магчымасць атрымання медыцынскай дапамогі і падарожжаў.

Мы не маем права кідаць на волю лёсу пенсіянераў, якія ў сучаснай Расеі вымушаны выжываць літаральна капаючыся ў смецці. Я лічу, што паказчык велічы дзяржавы – гэта ўзровень жыцця людзей пенсійнага ўзросту.

Турызм

Вышэй я ўжо абазначыў, фінансаванне якога роду атрымае турыстычная галіна ад падарожжаў пенсіянераў, але гэтым, вядома, падтрымка турызму ў рэспубліцы не абмяжуецца. Турыстычны патэнцыял рэспублікі вялізны, у нас дзіўная прырода, проста трэба развіваць усё ў сукупнасці.

Рэспубліка ўвядзе строгі высокі ўзровень абслугоўвання і інфраструктуры, а таксама дасць магчымасць прыватным мясцовым і замежным кампаніям заняць гэты рынак. Мы будзем весці маркетынгавую кампанію прыцягнення турыстаў з розных краін у рэспубліку, што дазволіць за 15–20 гадоў вывесці Башкартастан на перадавыя пазіцыі па турызме і будзе прыносіць, я ўпэўнены, самы вялікі адсотак падаткаў у бюджэт рэспублікі.

Смецце і экалогія

У асноўным праблема смецця ўзаемазвязана з праблемай энергетыкі, бо сёння на зямлі існуюць тэхналогіі, дзякуючы якім перапрацоўку смецця можна канвертаваць у энергію. Таму прыклад Нарвегія, якая, перапрацаваўшы ўсё сваё смецце, закупляе яго ў Швецыі і Даніі. Мы можам ініцыяваць прыход гэтай тэхналогіі ў рэспубліку, стварыўшы выгадныя ўмовы для скандынаўскай кампаніі, якая зможа ажыццявіць свой праект у рэспубліцы, што прывядзе да стварэння новых высокааплатных працоўных месцаў і створыць новую энергетычную сістэму, якую мы ўкарэнім ва ўнутраную сетку рэспублікі.

Нараўне з гэтым мы запусцім маштабную прапаганду супраць смецця на вуліцах і за падзел смецця. Трэба будзе абсталяваць усю рэспубліку пунктамі прыёму раздзельнага смецця. Мы павінны пакінуць нашым дзецям чыстае паветра і прыроду нашай Радзімы.

Рэлігія і грамадства

На тэрыторыі чацвёртай Рэспублікі Башкартастан у міры і згодзе будуць суіснаваць усе рэлігіі. Сама дзяржава, безумоўна, павінна быць свецкай.

Вышэй я казаў пра рэформу адукацыі – там я казаў пра ўвядзенне новых прадметаў, адным з якіх будзе ўрок «рэлігіі і культуры», на якім школьнікі будуць вывучаць гісторыі розных рэлігій і іх ролю ў жыцці чалавека, выхоўваць паважлівыя і талерантныя адносіны да прадстаўнікоў усіх рэлігій і розных культур.

Башкартастан заўсёды быў адкрыты да ўсіх нацыянальнасцей і культур і развіваў на сваёй тэрыторыі верацярпімасць і касмапалітызм. Я ўпэўнены, што гэта паказчык таго, што ўсе нацыянальнасці, якія жывуць у рэспубліцы, будуць жыць у сяброўстве і згодзе.

Уфа

Самай вялікай праблемай Уфы з’яўляецца колькасць машын у горадзе, жахлівая інфраструктура гарадскога транспарта і немагчымасць нармальнага і бяспечнага перамяшчэння пешаходаў. Для такога горада, вядома, патрэбна новая развітая сетка транспарта – хуткага, недарагога і экалагічнага. Таксама трэба спыніць вар’яцкае будаўніцтва чалавейнікаў у горадзе – я наогул дзіўлюся, што людзі купляюць такое жыллё, не думаючы аб тым, што ў гэтым доме будзе жыць яшчэ 1000 чалавек з імі, у кожнага машына, кожнаму трэба раніцай на працу, у школу, яшчэ куды па справах, а нармальнай інфраструктуры няма, часта забудоўшчыкі не будуюць ані нармальнай пляцоўкі, а двары ператвараюцца ў адну суцэльную паркоўку і пыльнае царства. Вам самім не брыдка жыць у такіх умовах? А калі ў такіх дамах завядуцца прусакі, то як іх прыбраць адусюль адразу?

У той час, калі ўвесь свет зразумеў, што малапавярховае будаўніцтва з’яўляецца самым камфортным для жыцця, Уфа расце ўверх, правакуючы новыя пробкі, новыя праблемы сабе і жыхарам сталіцы.

Таму найважнейшай для развіцця горада з’яўляецца змяненне яго філасофіі: у горадзе павінна быць камфортна жыць, павінны вырашацца праблемы з дарожнай інфраструктурай, а не паглыбленне праблем. Гэта, безумоўна, тычыцца не толькі Уфы – гарады рэспублікі павінны стаць камфортным, зручнымі і прывабнымі для жыцця і інвестыцый.

Свабода вышэй за ўсё

Мы сёння з вамі сведкі, да чаго прыводзіць таталітарызм. Мы бачым, што вялізная колькасць людзей пераследуюцца проста таму, што яны не згодныя з рэжымам. Мы бачым, як з журналістаў, актывістаў, прадстаўнікоў розных меншасцяў робяць ворагаў народа за іх меркаванне.

Мы павінны выхаваць у будучых пакаленнях непрыманне дыктатуры і гарантаваць плюралізм меркаванняў. Без свабоды не будзе ніякага развіцця, без свабоды мы зноў скацімся да аўтарытарызму, вайны і разрухі. Але за сваю свабоду трэба змагацца і біцца. Калі быць апалітычнымі і аморфнымі, то таталітарызм прыйдзе, захопіць вашу свабоду і адправіць паміраць.