LEMEŃ KUNDAMO VAL

Sundeŕkovoń 8 čistěnt́ tuś Tonačiv ine lomań – Orest Tkačenko (10.12.1925-08.11.2021).

Kie son? Meks ěrzätne iĺtit́ sonzě Tonačiv sümordoma dy teke marto paro, lembe dy pokš pitneń putoź lemeń kundamo valso?

Vana meks.

Orest Tkačenko uĺneś pokš sodydeeks, kona ěrämonzo, prevenzě, sodamočinzě putynze finněń-ugrań raśketneń kelest, kuĺturast dy jutaź pingest varčnemas. Synst jutkso – ěrzä raśkent́ dy kelent́ varčnemaskak.

Ěräś Ukrainaso, Kiev ošso. Uĺneś Ukrainań Sodyĺma Akademijaso važodicä pokš sodydeeks.

Tenzě uĺneś 95 iet́…

Čačś Haŕkov ošso. Tetänzo, lomaneń langso naŕgamo škatnestě, 1937 iestě, stäkodo pekstyź. Avazo uĺneś ěrzätnede, Oĺga Kosolapova. Orest Borisovič prädyze Kiev ošoń tökšškolant́. Ěrämonzo altyze keleń sodamo-varčnema teventeń. Sodyĺmań doktor, professor. Sodyĺ 15 keĺt́. Synst jutkso – ěrzäń kelent́kak. Noldaś keleń sodamočiń koräs lamo kinigat dy meĺsörmadovkst/stat́jat.

“Merä raśkeń keleś” kinigasonzo Orest Tkačenko, ěrzäń kelent́ ějs nežedeź, tejś terävks veĺmevtemenzě jomaź merä raśkeń kelent́.

Ěrzäń keĺdent́ dy ěrzäń raśkedent́ Orest Tkačenkoń melenzě parste nevteź “Vasoljalgań sörmat” lovnoma pusmosont́, konata noldazeĺ Saran ošso 2004 iestěnt́.

Ějsěnzě – Orest Tkačenkoń dy Mariź Kemaleń jutkso karado karšo 25 sörmatne, konat noldazeĺt́ ěrzätneń seĺme ikelksězěst “Ěrzäń Mastor” kulälopasont́.

Vana meze sörmadś Orest Tkačenko ěrzäń keĺdent́:

Minek vejsěń tökšmeleś, ěrzätneńgak, dy vesemeń, kit́ večksyź ěrzätneń (mon lovan ěś präm synst jutksoks), teems istä, ěrämga ěrzäń keleś pingede pinges.

Orest Tkačenko

Наше спільне завдання, і ерзян, і всіх, хто любить ерзян (а я себе до них зараховую), зробити так, щоб ерзянська мова жила вічно

Орест Ткаченко

Orest Tkačenkoń Tonačiv iĺtämsto miń, ěrzätne, kundatano valdo lemenzě, ledctnetäno prevej melenzě-arsemanzo dy lovnotano ěrzätneneń kučnoź sörmanzo.

Rungozo – tiriń modanteń, ojmezě – valdo menelenteń…

Ěrzäń Kirdijuroś