Anošoń Tumaeń, ěrzäń lomanent́, ěrzäń kojsě tonačiv iĺtämsto, lemeń kundamo val

Anošoń Tumaeń, ěrzäń lomanent́, ěrzäń kojsě tonačiv iĺtämsto, lemeń kundamo val

Ěrzäń raśke, ěrzät, ěrzäń raśkeń jalgat-ojat. Lotkado, čat́monede, arsezevede. Sodado, marädo, čaŕkodede. Ěrzäń raśkedent́, ěrzäń ěrämodont́, ěrzäń tevtnede, paro ěrzäń lomande.

Teči mazyde mazyj Ěrzäń Mastoront́ veĺkssě, sěńšt ěrzäń meneĺsěnt́, kirvazi od valdo teštine, konań lemezě – Anošoń Tumaj.

Son vańks, valdo dy lembine. Nej karmi sval vanomo tosto Ěrzäń Mastoront́ langs, ěrzäń raśkenek langs, dy, paräk, kevkstnemejak karmi: koda vansttano ěrzäń raśkenek-kelenenk? Sonzě varštavksozo Ěrzäń Mastoront́ langs istämo, kodamo uĺneś sonś neeń škań ine ěrzäń lomaneś Anošoń Tumaj (Nikolaj Ivanovič Anoškin). Valdo sěńšt seĺme, prevej, arsicä, pšti seĺme, apelicä, lamoń neicä dy lamos čaŕkodicä. Lomaneń dy ěrzäń raśkeń, keleń dy kuĺturań večkicäś. Ěrzäń Maraläń mešte kaznesě teškstaześ. A.Räbov lemsě Ěrzäń keleń idema Fondoń laureatoń lemsě javolävtoześ. Anošoń Tumaj – ěrzäń raśkeń večkicäĺ dy kepedicäĺ, ěrzäń teveń veticäĺ-topavtycäĺ. Istorik, publicist, arsicä, filosof, pek talanov artycä, kersicä dy pek lamos maštycä. Istät prevejt́ dy viev ěrzät čurosto čačnit́ Ěrzäń Mastorsont́. Lamoso paroso kaziź Anošoń Tumaeń sonzě tetäzo-avazo ty lezdaś tenzě tevsěnzě sonś Ineškipazoś.

Son setneń jutksto, kit́ ušodyź ěrzäń raśkeń veĺmevtema tevent́, kit́ veĺmevtst́ ěrzäń meĺjožont́. Son setneń jutksto, kit́ veĺmetiź Raśkeń Ozksont́, Ěrzäń Inekužont́, Ěrzäń Atäń Ězement́, Ěrzäń Inäzoroń statusont́. Sonzě prevenzě, vienzě, melenzě putoź vasence Ěrzäń muzeent́ dy Ěrzäń raśkeń parkont́-kolkant́ teemazost, ěrzäń istorijado lovnomapusmoń dy kinigań noldamos. Lamo prevejt́-paro sörmadovkst putś Anošoń Tumaj Inealtymas.

Čačś Anošoń Tumaj 1948 iestě, Nižnoj jonksoń Ivańbijo velesě, kon Luga Jan ošont́ malaso. Tosko ěrize vese mazyj dy tevsě süpav ěrämonzo. Träś kolmo paro ějkakšt.

Ěrzät, jalgat, vasolot dy malavikst. Sedeeń kundaź dy valdos-paros kemeź iĺtäsynek vandy Tonačiv večkeviks Anošoń Tumaeń. Kie malaso, molede iĺtämonzo-kalmamonzo. Kie vasolo, kirvaztete ěrzäń štatolně dy kundynk lemenzě.

Ineškipaz, saik Tumaeń valdo ojmenzě valdo menelezět́.
Ěrzäń Mastor, saik Tumaeń čeĺkenzě tiriń modazonok.
Ěräzo Ěrzäń Mastoroś! Ěrzäń raśke – čačtak Tumaeń tarkas odt sädot-töžat viev dy prevej ěrzät! Sestě a jomi ěrzäń raśkenek.

Syreś Inäzoroś
Pirguž arnevt́ Inäzoroś
Ěrzäń Atäń Ězemeś
Ěrzäń Inekužoń Prevkuroś

Корреспондент

Leave a Reply