Шәймиев: “Прокурорлар мәктәпләрдә йөрде – алар Конституцияне таптап йөрде”

Татарстанның дәүләт киңәшчесе Миңтимер Шәймиев мәктәпләрдә татар телен ихтыяри иткән прокурор тикшерүләрен тәнкыйтьләп чыкты һәм аларны “конституциягә каршы килгән гамәлләр” дип атады.

Шәймиев, “Яңарыш” фондының утырышында чыгыш ясап, полилингваль мәктәпләр булдыру татарстаннарның тел хокукларын якларга тиеш дип саный. “Русия һәм Татарстан конституцияләрен беркем дә кире какмаган. Без моны белергә тиеш һәм бу хакта әйтәбез дә: урыс һәм татар телләре республикада дәүләт телләре булып тора”, дип белдерде. Бу хакта “Азатлык Радиосы” яза.

Татарстанның беренче президенты 2017 елда Татарстан мәктәпләрендә узган прокурор тикшерүләрен тәнкыйтьләп чыкты. Әлеге тикшерүләрдән соң татар телен дәүләт теле буларак мотлак укыту туктатылды.

“Прокурорлар мәктәпләрдә йөрде – алар Конституцияне таптап йөрде. Конституциягә каршы мондый гамәлләрне ничек кылып була?”, дип сөйләде ул. Шәймиев сүзләренчә, республикада “конституцион хокукларны тормышка ашыруда хилафлыклар бар”, ләкин алар моны таныды. “Конституция бар, без аны үтәргә тиеш”, диде ул.

Шәймиев сүзләренчә, Татарстанда полилингваль мәктәпләрне ачу күп кенә проблемны чишүдә ярдәм итәчәк.

Элегрәк Шәймиев республикада өч телдә белем бирә торган полилингваль гимназияләр ачу тәкъдиме белән чыкты. Алар Казан, Чаллы, Түбән Кама, Әлмәт, Алабуга шәһәрләрендә төзеләчәк.

Беренче полилингваль мәктәпне 2020 елның сентябрендә 165нче мәктәп нигезендә ачу планлаштырыла. Моннан тыш, Казанның “XXI гасыр” торак комплексында да яңа бина салу каралган. Әлеге эшләр бюджет акчасына башкарылачак.