Национальнай меньшинствань тефнень коряс ОБСЕ-нь верховнай комиссарть анайхть лезкс араламс «Башкорт» пуромксть

«Воляшинь Рав-Урал» общественнай движениясь пшкядсь Национальнай меньшинствань тефнень коряс ОБСЕ-нь верховнай комиссарти Ламберт Заньерти, штоба сон лездоль «Башкорт» Башкиронь общественнай пуромксти.

Эрявикс пшкядема Заньерти тяфта же кучсь «Воляшинь Рав-Урал» общественнай движениять тииснон эзда фкясь, политическяй эмигрантсь Рафис Кашапов.

«Теенть лац содаф, кодама аф аралави вастса ащихть Российскяй Федерациянь юр эряй нароттне: 2001-це кизоста сявомок миндеенк аш кода тиендемс эсень национальнай партият, 2018-це кизоста сявомок школатнень эса национальнай республикань государственнай кяльхне арасть аф обязательнайкс тонафнеманди. Единай государственнай экзаменть школаста туйхненди ули кода маскомс аньцек рузонь кяльса. Тяда башка, теенк аф мярьгови нолдамс тевс латинскяй азбукать родной кяльсонк. Москусь мярьги тяштемс аньцек кириллицаса», – корхтави Кашаповть англань кяльса сёрматф пшкядемасонза.

Национальнай меньшинствань тефнень коряс ОБСЕ-нь верховнай комиссарти сёрмаса Рафис Кашапов эняльди пшкядемс россиянь оцюнятненди и мярьгомс лоткафтомс «Башкорт» пуромксть каршес моли политикань судебнай процессть. А тяфта же тердемс Москуть лоткафтомс РФ-нь юр эряй нароттнень лангс шарфтф насильственнай рузыямань политикать.

Корхтамок сёрмать эвондаманц колга, Рафис Кашапов китькстазе, судебнай преследованиятне и национальнай движениянь активисттнень лангс молемась – тя ся прябалатне, конат ащихть Рав-Уралонь сембе нароттнень инголе: «Сембе содасазь, што татархнень и башкирхне аф пяк ладяйхть фкя-фкянь мархта. И тянь колга аф эряви сёпомс. Шарьхкодеви, ламонц кизефксне аф вановихть фкя дискуссиять или конференциять видеса. Тяка пингть, мон ёран мярьгомс: сяда цебярь тиемс ёмла, но афкуксонь тев, кона лезды кемокстамс соткснень минь народоньконь ёткса. Тянь инкса минь и путсаськ сембе виеньконь, штоба тястонь оцюнятне афолезь токсе «Башкорт» пуромксть. Тячи минь марсотама башкирхнень мархта».