Эстониять эзда вешихть лезкс идемс Россиянь юр эряй нароттнень

Henn Põlluaas

Башкиронь, бурятонь, эрзянь, калмыконь и татаронь национальнай движениянь ломаттне пшкядсть Эстониянь парламентти. Пшкядемасост шарфтсть мяль ассимиляциянь политикать касоманцты, активисттнень и национальнай пуромкснень каршес моли политикань од репрессиятнень колга.

Рейгикогу Президентти панжада пшкядемаса корхтави, кода сидеста Россиянь кирдивийсь кармась люпштама национальнай пуромкснень и кемомань организациятнень тевснон эса, аш кода азондомс пуромкснень эса эсь мяльцень, люпштайхть-панийхть юр эряй народонь активисттнень эса и стак тов.

Сёрмань авторхне шарфтсазь эстононь политикнень мяльснон «Башкорт» общественнай пуромксть люпштаманц и сёлгоманц лангс. Тяфта же азондови татаронь, ингушень, калмыконь, черкесонь, бурятонь национальнай движениянь вятихнень каршес ламонц судебнай процесснень колга. Башка шарфтови мяль аф пяк шарьхкодеви расследованиятнень лангс, конат сотфт «Адыгэ-Хасэ» черкесонь од ломанень движениянь активистть шавоманц мархта 2010-це кизоня, 2018-це кизоня ингушень активистть Муслим Хашагульговть, 2015-це кизоня «Эрхэ» бурятонь правань ванфтомань движениять ушедыенц Евгений Хамагановть, 2018-це кизоня ингушень активистть Рустам Льяновть.

Пшкядемань сёрмадыхне тяфта же китькстазь школьнай образованияста юр эряй нароттнень кяльснон шашфтомаснон, мезсь сярьгядьсыне активисттнень молемс тяфтама радикальнай аськолксненди, кода 2019-це кизоня удмуртонь ученайть Альберт Разинть эсь прянь плхтамац.

Эстониянь парламенть инголе эняльдихть:

  1. Максомс питне Россиянь тефненди, конат шарфтфт юр эряй нароттнень политикань, гражданскяй, национальнай, религиознай и культурнай праваснон коламаснонды и кардамаснонды.
  2. Кемокстамс РФ-ть лангс дипломатическяй люпштамать юр эряй нароттнень ассимиляциянь лоткафтомать инкса.
  3. Шарфтомс башка мяль РФ-нь юр эряй народонь кяльхнень араламаснонды, синь мрдафтомаснонды школьнай программатненди кода обязательнай предметонь.
  4. Анамс Россиять кядьста лоткафтомс юр эряй народонь активистонь люпштамать и нолдамс политиканкса сёлкфнень.
  5. Нодамс тевс Россиять лангс народъётконь сембе политико-дипломатикань и санкционнай механизматнень ломанень правань и свободань ванфтоманкса.
  6. Анамс РФ-ть эзда нолдамс тевс РФ-нь Нилеце заключениять, кона примафоль Европань Советонь национальнай кржа народонь араламань рамочнай конвенциянь Консультативнай комитетса (ACFC / OP / IV (2018) 001).
  7. Нолдамс тевс РФ-нь кирдивиянь ся оцюнятнень лангс санкциятнень, конат люпштайхть юр эряй народонь активисттнень эса.
  8. Лездомс юр эряй народонь пуромкснень вятиснонды, конат аралайхть эсь праваснон, ванфтыхть койснон, кяльснон и культураснон эса.

«Минь пшкяттяма эстононь ломаттненди кода народти, кона содасы свободать питненц. Теенть аф эряви азондомс, кода стака ащемс каршек ассимиляциянь политикати, кода аф максомс сёлгомс эсь кургцень, мезе тя тяфтамсь, мзярда сембода эрязатнень кирдивийсь ёрай озафтомс или шавомс. Эстононь ломаттне ётнесть тя сталмотнень ланга эсь эряма пингстост. Кда эряма пингсь нинге мезендивок тонафты, сон тонафты аф сёлгондомс сельмотнень, мзярда шавихть мала ломаттнень эса, аф мишендемс эсь принципнень и питнетнень. Минь кематама и учтама лезксонтень эса!», – китькстазе пшкядемать инициатороц Сыресь Боляень.

Пшкядемати путозь кядьснон:

Фаузия Байрамова, татаронь народонь Милли Меджлисонь вятись; Рафис Кашапов, «Воляшинь Рав-Урал» общественнай движениять фкясь ушыдыензон эзда; Сырень Боляень Инязорсь; Аркадий Гараев, Калмыконь репрессированнай народонь региональнай фондть вятиец; Владимир Хамутаев, «Нэгэдэл» национальнай марстомомань движениять вятиец, бурятонь народонь Конгрессонь Президентсь; «Башкорт» башкиронь общественнай марстомомась; Дмитрий Доровских, Кубанень ширде пшкядись.

admin

Leave a Reply