Эрзятне кемокстазь национальнай кирдиюронь системать

Эрзятне кемокстазь национальнай кирдиюронь системать

Россиянь финно-угрань фкясь инь оцю нароттнень эзда – эрзятне – кемокстазь национальнай кирдиюронь системать. Тяфтама мяльс Атянь Эземсь сась пяденцяста, 1-це майста. 

Национальнай кирдиюронь системать тиеманц и тевс нолдаманц коряс каготти сувайхть кота юропт. Эсост китькстафт национальнай молемать вешфксонза, сонь кирдивиец, тевсна и структурась. Ваномок каготть лангс, национальнай кирдиюронь молемать вятьсы Промкссь – эрзянь политикань партиятнень и общественнай марстомоматнень эзда делегаттне. Атянь Эземсь анокласы Пуромксть и кочкасы Инязорть, кона корхтай эрзянь ломаттнень лемста. Кда улихть национальнай партиянь тиемань и тевс нолдамань коряс закононь перяфкст (тяфтама закон ули РФ-нь законодательстваса) – Промксонь тефнень эсь лангозонза сявсыне Атянь Эземсь. 

Промксть, Атянь Эземть и Инязорть инь оцю вешфксоц – эрзянь ломаттнень национальнай, политическяй, экономическяй и культурнай праваснон ваномасна и тевс нолдамасна. Тяфта же ётксост, эсь эряма вастсост национально-государственнай самоопределениянь лангс правась.

Инязорсь Боляень Сыресь азозе валонц тянь колга: «Эрзятень инголе ащихть стака прябалат: ассимиляциянь кеме политика, ломаттнень кирьфтамасна, республикань и федеральнай властсь аф шарфты мяль минь праваньконь лангс. Тяфтама прябалатне аф машфтовихть активисттненди ськамост. Оцю масторса народть сяда тов касоманцты кржа ванфтомс народонь койхнень аньцек семьяса. Ёрат эрямс – эста аш кода ащемс фкя вастса. Эрзятненди эряви марстомомс, или 21-це вексь ули мекольцекс народоньконь историясонза.  Тянь сюнеда мон тиине и максыне Атянь Эземти ваномс документть,  кона лезды кочкамс национальнай молеманьконь и тиемс сонь сяда тевонь кандыкс. Майста ни эрзятне няйсазь васенце аськолкснень Кирдиюрть тевсонза. Минь вешфксоньконь сяда тов молемаснонды эряви шарьхкодема и лезкс эрзянь народть ширде. Минь надиятама лезкс лангс».

Тяфта же Атянь Эземсь ванозе, кодама тефт эряви тиемс 2020-це кизоста. Ётксост: сембе Россиянь ломанень лувомати анокламась, эрзянь кяльть касфтомац, Саранскяйса эрзянь гимназиять коряс кампаниять поладомац, од ломаттнень сярьгядемасна национальнай молемати.

Арамс содавикс Национальнай кирдиюронь системать панжеманц колга положениять мархта ули кода Инязорть официальнай сайтсонза.

Корреспондент

Leave a Reply