Чиновникне азозь эрзятненди гимназиять аф эрявксшинц колга

Чиновникне азозь эрзятненди гимназиять аф эрявксшинц колга

Ламонц эрзятне кучсесть сёрмат республикань оцюняти, коса пшкядсть панжемс Саранскяйса эрзянь гимназия. Мордовия Республикань минестерствась макссь каршек вал эрзянь активисттнень кампанияснон лангс.

Сёрмать эса, конанцты кяденц путозе Иван Дугушкин, ниле лопаса тяштьф эрзянь гимназиять аф эрявксшинц колга. Кле, республикаса тяфтонга покоди «Мы в Мордовии живём» региональнай модульсь, а эрзянь кяльсь тонафневи 73 кружокса, коза якай 1 340 шаба. Иван Дугушкин китькстазе сёрманц тяфтама валса: «в Республике Мордовия и городском округе Саранск созданы оптимальные условия для изучения и сохранения эрзянского языка».

Тяконь видеса сонць минестерствась няфни аф пяк кеняртьфти статистика. Сембе республикати ули аньцек 28 школа, коса эрзянь кяльсь тонафневи 2-3 частт недляти, и 93 школа, коса сон тонафневи 1-2 частт недляти. Тяфта, Мордовиянь пцтай сембе школатнень эса эзянь кяльсь тонафневи сяда шуроста английскийть или лия кяльхнень коряс. А ламонц школатнень эса аф тонафневи ёфси.

«Теенк лац макссть шарьхкодемс, што гимназиятне и университетне – тя рузонь культурати, а эрзятненди улихть кружокт и «Мы в Мордовии живём» региональнай компонент. Эрзянь кяльса образованиять вастс теенк максыхть шачема крайть коряс кружокт и фольклорть колга корхтамат. Чиновникне вятьсамазь минь калмос. Минь тяряфнетяма лисемс тя лоткть эзда, а теенк корхтайхть: «Тон матт, матт. Аф эряви каршек ащемс. Тя – естественнай процесс». Кда минь аф марясамазь Россиянь оцюнятне, эста теенк мезевок аф лядонды, аньцек пшкядемс народъётконь сообществати, сяс мес минь тяни аш эрзянь кяльса образованиять лангс праваньке», – арьси Йогань Минька, Саранскяйса эрзянь гимназиять панжеманц инкса гражданскяй кампаниять эзда фкясь.

Лятфтасаськ, октябрьста 2019-це кизоня Инязорсь пшкядсь Мордовия Республикань правительствати панжемс Саранскяйса эрзянь гимназия. Сяка ковть Саранскяйть оцюняц Пётр Тултаев лемдезе тя мяльть аф эрявиксокс и китькстазе: «В школах Саранска, особенно в районах с компактным проживанием мордвы, национальные языки изучают. В садиках изучают культуру народов Мордовии и языки».

Январьста 2020-це кизоня эрзянь ламонц семьятне кучезь эсь сёрмаснон Мордовия Республикать оцюнянцты Владимир Волковти, коса пшкядсть тиемс Саранскяйса гимназия, коса «эрзянь кяльсь аф аньцек вятеволь кода предмет, но и ламонц обязательнай предметтне лувовольхть родной, эрзянь кяльса».

Корреспондент

Leave a Reply