Россияса, Венгрияса и Словакияса ётнихть удмуртонь кяльти лемтьф пуромкст

Урок удмуртского, в радиоэфире Алина Чернова и Августина Михайлова.

Илань аноклайхнень ёткса – удмуртонь активистсь, национальнай кяльть и сонь касоманц мархта сотф прябалатнень коряс экспертсь, «МУШ» общественнай пуромксть эзда фкясь Артем Малых.

Тячи сембе масторть пачк молихть Удмуртонь кяльти лемтьф пуромкст, тянь колга сёрмады «Idel.Реалии» журналистсь Зоя Симбирская. 27 ноябрсь – тя шись, мзярда эвондась «О языках Удмуртской Республики» законць, кона макссь удмуртонь кяльти государственнай кялень статус.

Омбоце кизось ни национальнай культурань лятфтавикс шить тяшкснесазь Удмуртонь Республикаса, Москуса, Татарстанца, Башкортостанца, Санкт-Петербургса, Венгриять пряошсонза Будапештса. Васенцеда Удмуртонь кялень шись тяшкстави нинге и Словакияса. Тячи Будапештса Этвеш Лорандонь лемса университетса финно-угрань кялень кафедраса ётай творческяй илядь. Иласа кармай: удмуртонь кялень юрхнень колга курс, тяниень пингонь морайхнень мархта содафтомась, коень кштима, удмуртонь квиз и «Ӟеч перепеч» шра лангса налхкома, конань эса эряви кочкамс коень ярхцамбяль карточкатнень эзда – сембось ётни удмуртонь кяльса.

Лятфтасаськ, 10-це сентябрьста удмуртонь ученайсь, удмуртонь национальнай молемать активистоц Альберт Разин плхтазе эсь прянц. Маласонза муфольхть транспарантт, конатнень эса сон тердсь араламс удмуртонь этность: «И кда ванды монь кялезе юмай, то мон анокан тячи куломс». Тяка шиня следственнай комитетсь панчсь уголовнай тев 110 УК РФ статьять 1 пяльксть видеса («Доведение лица до самоубийства или до покушения на самоубийство путём угроз, жестокого обращения или систематического унижения человеческого достоинства потерпевшего»). Кулоф ученайть мала ломаненза и ялганза содасазь, што Альберт Разин шавозе эсь прянц сянь инкса, мес власттне лама пинге ашесть шарфне мяль коень культурать и кяльть ванфтоманц коряс эняльдеманзон лангс. Правоохранительнай оргатне аделазь уголовнай тевть коряс расследованиять и ашесть му муворуфт.

Удмуртонь активистсь, национальнай кяльть и сонь касоманц мархта сотф прябалатнень коряс экспертсь, «МУШ» («меш» удмуртонь кяльса) общественнай пуромксть эзда фкясь Артем Малых китькстазе, што Альберт Разинть колга корхтамс республикаса аф мярьгови.

– Альберт Разинть и сонь тевонц колга корхтамс кайгиста аф мярьгови, – азозе удмуртонь активистсь Артем Малых. – Мон аф ёран, штоба сонь колганза историясь юкставоль, и минь тяряфттама азомс Альберть Разинть колга пуромксса Москуса.

Активисттне корхтайхть, што тя тевть мархта синь ёрайхть шарфтомс мяль родной кяльть мархта сотф прябалати, кона ули аф аньцек удмурттнень. Удмуртонь кяльти лемтьф пуромксне ушедсть Россияса 20-це ноябрьста. Синь аноклайсна и арьсисна – МУШ пуромксонь активисттне «Удмурт Кенеш» ассоциациять лездоманц вельде. Тячи Ижевскяйса «Лудорвай» музейса «Юмок» театральнай студиясь кармай морафтома «Алнаш зомби» пьесать. Москуса Горькяйнь лемса Литературнай институтса Вера Пантелеевась морафты 20-це веконь удмуртонь литературать колга лекция, а пуромксонь инжихне варжасазь пизелксста и чивгста тиф удмортонь коень симомбяльхнень.

МУШ общественнай организациять лувомаснон коряс, удмуртонь кяльть содасазь 324 338 ломань. 58,7% удмурта тяшкстазь удмуртонь кяльть роднойкс. Удмуртонь Республикаса удмуртонь кяльсь кода предмет тонафневи 32% школатнень эса, а тяфта же 38% дошкольнай образовательнай учреждениятнень эса. Тяфта, тонафнемать ширде удмуртонь кяльсь кода государственнай кяль моли аф сембоса. Удмуртонь кяльсь кода родной кяль тонафневи велень школатнень эса, коса удмуртонь кяльса корхтай ломаньда сяда лама.

admin

Leave a Reply