Мордовиянь оцюнятнень тердихть панжемс эрзянь гимназия

Эрзянь народть Инязороц Боляень Сыресь азсь мяль Мордовия Республикань Правительствати панжемс Саранскяйса эрзянь гимназия. Сон арьси, што Россиянь финно-угрань нароттне юмсихть ассимиляциянь политикать инкса, конань ётафнесы Москусь.

«Минь ломаненьке ащихть ассимиляциять ширде пякстама ала. Ламонц эрзятне, конатненди тячи 20-40 киза, содасазь эрзянь кяльть кальдявста, нолясазь тевс аньцек стакшинь корхтамаса. Синь аф маштыхть сёрмадома эрзякс. А лядыксне ёфси аф содасазь эсь кяльснон. Тя моли и од семьятнень эса, конат эряйхть марнек эрзянь велеса. Рузыямась тяшкава кассь, што кяленьконь юмаманцты саты и аньцек кирдемс тяка ситуациять. Кле, тонафтость идентень эрзянь кяльти, корхнеда эрзякс семьяса! Кода тя лемдеви?! Рузонь кяльть касоманцты и тонафнеманцты максовихть оцю ярмакт бюджетста, а эрзянь кяльть оцюнятне корхтайхть араламс семьяса. Эрзянь гимназиясь – тя надобия минь нацияньконди. Аф кармай гимназия – аф кармайхть условият, коса касоль кяльсь, литературась, тонафнемась! Москути эряви учемс нинге 15-20 киза, штоба афоль уль аф аньцек эрзянь, но и маринь, и удмуртонь кяльхне. Арьсян, тянь лац шарькодезе Альберт Разинць, сяс и плхтазе эсь прянц. Минь аш пингоньке!» – азозень эсь мялензон Боляень Сыресь.

19-це сентябрьста эрзянь Инязорсь пшкядсь Эстониять эзда Европань Советть Парламентскяй ассамблеянц членонцты Ээрик-Нийлес Кроссти максомс питне Россиять национальнай политиканцты, ломанень праватнень мельге ваномати, конатнень ёткса финно-угрань нароттненди родной кяльса образованиянь максомаське.

10 сентябрьста Удмуртиять пряошсонза Ижкар (Ижевск) ошса плхтазе эсь прянц ученайсь Альберт Разин. Сон тердсь араламс удмуртиянь нациять и кяльть.

Январьста 2019 к. Европань Советть национальнай меньшинстватнень араламаснон коряс Рамочнай конвенциянь Консультативнай комитетсь апряказе Россиять национальнай политикать инкса. Эксперттне няфтезь пичедемаснон рузонь кяльть касы доминированиянц инкса, сяка пингть кода национальнай меньшинствань кяльхе аф вановихть ёфси.

admin

Leave a Reply