Kojluvoś kemekstaź

Idems dy vanstams ěś kelent́, kuĺturant́, kojtneń, lisni ansäk set́ raśketneń konat purnaź vejs nacionaleń idejasont́, konasont́ ěŕva lomaneś lovi ěś pränt́ raśkeń peĺkskeks. Ušosont́ XXІ-ce pinge, teči avoĺ ansäk undoks raśketneń, natoj bueń sülmavkstněń, dy baška bujtneńgak ulit́ ěś kočkavt kurost, konatat raśkeń peĺde kortyt́ dy vitnit́ globaleń dy lokaleń problematneń.

Karmi ěrämo lomaneś kenževteme? A sindeź sur marto? Nama karmi. Vasnäjak diskomfortso, sede tov tonadovi. A buti jomavtoź avoĺ suroś a udemeś? Udemevteme rungoś jomi. Istä raśketnejak. Raśkeś vetikurovtomo, vetisistemavtomo, aravty ěś pränt́ kalmo čires.

Raśkeń kočkavtkuroń sistemaś te udeme, kona veti rungont́, kona sody dy meri meze teems, znärdo ojmsems, mezneń tonavtnems, koda pičkavtoms ormant́…

Rossijaso undoks raśketneń ěricätne pek seet́stě lectnit́ Amerikań indeectněń. Kelät Amerika naŕgaś-iznäś synst, mejś teči teńsě čumovtyt́ Rossijań? Ansäk te uĺneś umok. «Ěkspertněń» araś melest sodams, koda teči ěrit́ indeectně. Paräk synest a večkevit́ tečit́ faktně? Vana čeroki raśkeś, ansäk kavto töža lomant́ kortyt́ tiriń keĺsěnt́, ansäk synst uli ěś Atäń Kurost, prävtvetikurost, videkurost dy, natoj konstitucijastkak. Ěrämo tarkasost uli ěsest patruleń policijast. Ulit́ ěŕva kodat komissijat konatatneń važodemast kisě pandovi Amerikań büdžetstěnt́:

• Tonavtomateveń komissija;
• Šumbračiń vanstoma komissija;
• Finansoń komissija;
• Raśkeń vanstomań dy kastomań komissija;
• Resursoń vetämoń komissija;
• Mikšnema – ramamo kevkstematneń komissija;
• Prävtvetikuroń resursoń komissija, kona korty Amerikań prävtvetikuront́ marto čeroki raśkenteń lezdamodont́;
• Informacijań komissija;
• Lomań meĺtopavtomań idicä komissija, dy sede tovgak.

Te avoĺ kodatkak «simvolikań atributt», te realeń kirdij institutt, konat lovovvit́ Amerikań prävtvetikurosont́ alkuksoń raśkeń vetikuroń sistemaks. Nej lectäsynek, meze te riśmestěnt́ uli ěrzätneń? Nama, ruzoś šoždasto jovtnesy ěrzänteń mejś sonenzě a ěrävi ěsenzě prävtvetikuroś, konstitucijaś ěli policijaś. Te, meri son, aštiks, a ěräviks. Lamot lovit́ undoks raśketneń ěrämostkak a ěräviksěks, aštiksěks. Vana, uleveĺt́ vese ruzoks, dy ruzoń nacionalistěks, dy problematkak a uleveĺt́ kirdivient́ kodatkak.

Ěrzätneneń učoms lezdamo federaleń prävtvetikuront́ peĺde smusteś araś. Ěrzätne a čeroki raśke, Moskovoś a Vašington. Ěrzäń problematne te ěrzäń präń sěred́ksěś. Veinst merit́ – tynś vitnede ěś problematneń. Lijatne – kardyt́ ěrzäń snartnematneń vitnems net́ problematneń. Seks ěrzätneń araś kodamojak kočkamoči. Ěrzätneń ansäk vejke kist: – ěśpräńorganizacijaś. Vejs purnamoś. Buti istä a uli – minek raśkent́ a karmi kodamojak vandyčizě. Te kident́, ěrzäń ajgemadont́, sede, kodat meĺssamot kemekstaź Atäń Ězemsěnt́, jovtni Syreś Boläeń Inäzoroś.