Ěrzäń Inäzoroś javolävtś: Ěrzäń Raśkeń promksoś zärs a jutavtovi

Tede kuläś putoź Inäzoront́ oficialoń I-vaĺmasont́.

Ěrzäń raśkeń kočkavicä vetikurotneń purnamodo-teemado Kojluvont́ koräs, konata kemekstazeĺ Atäń Ězemsěnt́ tunda 2020 iestěnt́, Promksoś putoź ěrzäń raśkent́ tökš kočkaź lomaneń vetikuroks. Promksoś purnavkšny 5 ies vest́, zärdo ulit́ uslojt́ oläčisě, kodamojak kardamovtomo jutavtoms kočkamot Ěrzäń Mastoroń modatneń langso. Zärdo kirdivient́ peĺde ulit́ kardamot ěrzäń raśkeń partijatneń dy vejsěndävkstněń turtov – Promksoń purnamoś-terdemaś ajgevi se škant́ vid́s, zärdo synst važodemast karmi moleme panžado mereź.

Zärdo ulit́ istät kardamot, sestě Inäzoroś javolävty baška Merema, koso pačtävi – Promksoń terdemaś-purnamoś zärs a jutavtovi. Istämo Meremant́ javolävtomado mejle Promksont́ tevenzě topavty Atäń Ězemeś, se škant́ vid́s, zärs od Meremaso Inäzoroś a javolävty teškstaź kardamotneń araśčidest.

Seĺme ikelev noldaź tevkonövsont́, konań alo putoź Inäzoront́ ked́čeĺkezě, sörmadoź: «Ěrzäń Mastoroń modatneń langso dy vese RFsě politikań stakačitneń meĺsě kirdeź, neeź, koda avidečisě pansevit́ raśkeń teveń kis melävtycä lomantne, koda kirdivieś a puty lomańks jurovt raśketneń kočkaź lomantneń – javolävtan: net́ tuvtaltněń kuvalt Promksoś zärs a jutavtovi».

“Miń parste sodatano RFsě lomaneń pansematnede –pekstnematnede, federalizacijań kolamodont́. Teń langs apak vano ěrzä raśkeń ajgemaś sastyńkine važodi ěś kočkavicä tevvetämo – kuroń sistemań (Kirdijüroń) teemasont. Minek ikeĺćtevenek – panžado, pačk nevteź, mezeń vid́s te teevi putiněń Rossijasont́, purnams Atäń Ězement́ dy jutavtoms Inäzoroń kočkamot. Syń karmit́ jovtamo vese ěrzätneń ěrämomelest ěrzäń raśkent́ peĺde. Ěrzäń raśkeń kočkavt tevvetämo kurotne te avoĺ ansäk od ěskeĺks ěrzäń raśkeń tevajgemasont́, te karmavtyks tevgak. Činlomantneń, konat putoź verde, arast́ pravast kortams ěrzätneń peĺde, synst araś mandatost ěrzäń raśkent́ peĺde, syń a vanstyt́ ěrzäń lomantneń melest dy a kirdit́ val ěrzätneń ikele”

– istä nuŕkinestě jovtyze Boläeń Syreś Inäzoroś ěś Meremanzo smustenzě-zěmenzě.