Эрзятне тердихть Мордовия Республикань оцюнять панжемс эрзянь гимназия

Эрзятне ушедозь Саранск ошса тяниень пингонь эрзянь гимназиять панжеманц коряс общественнай кампаниять. Тя гимназиять эса тонафнемась вятеволь эрзякс.

Эрзятне семьянек пшкядихть Мордовия Республикать оцюнянцты Владимир Волковти панжемс Саранскяйса тяфтама гимназия, коса «эрзянь кяльсь аф аньцек вятеволь кода предмет, но и ламонц обязательнай предметтне лувовольхть родной, эрзянь кяльса.

Тя мяльть колга азонды эрзянь сёрмадысь Эрюш Вежай: «Эрзятнень ёткса кунара корхтави эрзянь гимназиять эрявксшинц колга. Тяниень пингонь коень культурати аш кода касомс и вииямс кухняса. Теенза эрявихть асу сёрмадыхть, журналистт, сценаристт, кяльста кяльс ётафтыхть. А коста теест сявовомомс? Ся школатнень эзда, коса эрзянь кяльсь тонафневи факультативна фкя час недляти? Тяфтама асу ломатнень касомаснонды эряви башка васта. И тяфтама вастокс тонафтыхненди и тонафнихненди арай эрзянь гимназиясь».

Эрзянь активисттне тяшкстайхть: «Российскяй Федерацияса «кялень конкуренциянь» колга корхтамась – тя рахсема тев. Эрзянь кяльсь тиевсь «ашу раднякс», мзярда сонь тонафнема пингоц нелькф и максф лия кялень тонафтомас, лия культурань касфтомас. И тяконь видеса эрзятненди мярьгихть ётафнемс рузонь кяльть мархта пялькстомат кухнява и велева. Кодама конкуренциять колга моли корхтамась, кда рузонь кяльсь тонафневи 8-9 частт недляти, а эрзяннесь – весть!

Эрзятне пичефксуста рахсихть: Федеративнай Договорть сёрмадоманц меле кялень тонафнема койса полафтсь аньцек фкя тяшкс! «Русский вместЕ с эрзянским» тячи лувови кода «Русский вместО эрзянского», – корхтай Эрюш Вежай.

Лятфтасаськ, октябрьста 2019-це кизоня Инязорсь пшкядсь Мордовия Республикань правительствати панжемс Саранскяйса эрзянь гимназия. Сяка ковть Саранскяйть оцюняц Пётр Тултаев лемдезе тя мяльть аф эрявиксокс и китькстазе: «В школах Саранска, особенно в районах с компактным проживанием мордвы, национальные языки изучают. В садиках изучают культуру народов Мордовии и языки».