Коронавирус: вештяма оцюнятнень эзда эрявикс тефт

COVID-19 сярядемась аф содай перяфкст и пяк вишкста моли Евразиянь масторхнень ланга. Ваномок официальнай сёрматфкснень лангс, 19-це мартти самс, сярядида Россияса лувондови 150-ть маласа, и тя лувкссь касы.

«Воляшинь Рав-Уралсь» пшкяди Мордовиянь, Чувашиянь, Марий Элонь, Татарстанонь, Удмуртиянь и Башкортостанонь оцюнятненди, анай сяттнень кядьста тяфтама тефт, конат кирделезь урмать сяда тов молеманц. Анок ли медицинань системась тюремс тя сярядемать мархта тя пингть?

1.            Нолдамс тевс карантинонь режимть: сёлгомс сембе учрежениятнень ярхцамбялень лавкатнень, аптекатнень и заправкатнень башка. Ломаттненди мярьгомс сяда ламос ащемс кудса, лисендемс аньцек ярхцамбяленкса и надобиянкса, покодема васту, мала ломаньцноны (кда сятне сярядихть).

2.            Сёлгомс республикань перяфкснень. Сембонди, кит эряйхть Рав-Уралонь республикаса, эряви ётамс 14 шинь карантин (изоляция).

3.            Аф мярьгондемс лисендемс ушу араламань маскафтома и резиновай перчаткафтома.

4.            Апрельть пес сёлгомс республикаса лама ломань мархта илатнень и пуромкснень. Тяфта же пшкядемс Россиянь правительствати аф ётафнемс Конституциять коряс сембе Россиянь вайгелень максомать, кона аноклаф 22-це апрельти.

5.            Аф ётафнемс илат и лама ломанень лия пуромкст, конатнень тяфта же пандсазь бюджетста (1-це майсь, 9-це майсь и лиятне).

6.            Аф пандомс премият чиновникненди, судебнай органонь, прокуратурань, ФСБ-нь, СК-нь, МВД-нь, Росгвардиянь покодихненди.

7.            Ванф ярмакнень нолдамс тевс инфекционнай пчкафтомань кудонь панжеманди республикань ся аймакнень эса, коса синь ашет. Рамамс сяда лама аппаратта тевлавонь искуственнай вентиляциянди

8.            Тиемс эрь республикать эса стабилизационнай фонд, кона лездоль пчкамс коронавирусть мельге, лездомс социальнай ширде аф аралаф ломаттненди. 

9.            Апрельть пес тиемс налоговай ваймамашит ёмла и средняй бизнести. 31-це майти самс тиемс временнай моратория од документальнай и фактическяй налоговай проверкатнень ётафтомаснонды и ушетфнень сяда тов молемаснонды. Нолдамс 1-це мартста сявомок 30-це апрельс молемок пандомань просрочкатнень и потребительскяй кредиттнень инкса штрафнень и пениятнень эзда.

10.          Афкуксонь пингонь режимса азондомс ломаттненди ся тефнень колга, конатне тиендивихть пандемиять мархта тюремать видеса. Ули ли республикаса эрявикс лувкс: медицинань маскада и респираторда, тевлавонь искуственнай вентиляциянь аппаратта, сярядихненди удомань вастта.

Эсь пингстонза тиф тя тефне лездыхть араламс ломаттнень стака сярядемада. Терттяма путомс ломаттнень эряфснон сяда вяри Владимир Путинть властенц пролонгациянц коряс.

admin

Leave a Reply